SAMBALTUMIS: Gambar Perang Poster

Lihat gambar-gambar perang poster Bukit Gantang di sini http://picasaweb.google.com/truth.voices/TaipingWatchGroup#

TOMBO ADAT - ASAL USUL MINANGKABAU

Dipanggang-panggang di gatok
dikirai-kirai dibaka
Tatangguak ikan gulamo
dibilang-bilang di atok
dikirai-kirai dipapa
dikambang si tambo lamo

Takalo maso dahulunyo
samusim maso saisuak
katiko langik basentak turun
bumi basentak naiak
lauik sacampak jalo
tanah darek balun lai leba
nan timbua gunuang merapi

Lorong di niniak moyang kito
asa usua kalau dikaji
didalam si tambo lamo
sapiah balahan tigo jurai
Sajurai ka banda cino
sajurai ka banda ruhum
sajurai ka pulau ameh nangko

Pihak di Sutan Marajo di Rajo
taniaik di dalam hati
tacinto dalam kiro-kiro
balayia inyo dimaso itu
di ateh dandang nan sabuah
cukuik jo cati bilang pandai

Dek lamo dandang balayia mak
didalam lauik baharullah
tampaklah api takijok-kijok
gunuang suaso maso itu
diateh puncak langgapuri
banamo gunuang marapi

Sinan sirangkak nan badangkang
sarato buayo putiah daguak
dibatu ampa putiah
di bukik ampa patigo
banamo bukik siguntang-guntang

Dimano titiak palito
dibaliak telong nan batali
dimano turun niniak
kitoiyo di puncak gunuang merapi

Basentak turun ka bawah
la tibo diguguak ampang
sinan lagundi nan baselo
sinan pulau bataratak
sabalun bakorong dengan kampuang
sabalun bakoto jo nagari

Maso badeta-deta upiah
maso bacawan panarahan

Dek lamo alam baputa
urang batambah kambang juo
kamanakan manjadi banyak
dibuek sawah jo ladang
dibuek adat dikarang undang
disusun tangkai ciek-ciek
dipaku katiang panjang
makanan urang tigo luhak

Manolah luhak nan tigo
nan tuo luhak Tanah Datar
nan tangah luhak Agam
nan bungsu luhak Lima Puluah
lalu karantau jo pasisia
alam surampi sungai pagu

Manuruik barih balabeh adat
nan salilik gunung merapi
saedaran gunuang pasaman
sajajaran sago jo singgalang
saputaran talang jo karinci

Dari sirangkak nan badangkang
hinggo buayo putiah daguak
sampai kapintu rajo hilia
durian ditakuak rajo
Sipiak pisau anyuik
sialang balantak basi
hinggo aia babaliak mudiak
sampai ka ombak nan badabuah
Sailiran batang sikilang
hinggo lauik nan sadidi
rao jo mapatungga sarato gunuang mahalintang

Pasisia banda sapuluah
hinggo taratak aia hitam
sampai ka tanjuang simalidu
pucuak jambi Sembilan lurah

(Tombo Adat ini di petikan dari Sungai Kuantan )

SAMBALTUMIS

08 April 2009

Gambar Perang Poster

No comments: